Umakyat sa +1 (neutral) ang net satisfaction rating ng Pambansang Pamahalaan ngayong Hunyo 2026 mula sa -13 (poor) noong Marso 2026, batay sa pinakabagong survey ng Social Weather Stations (SWS).
Isinagawa ang survey noong Hunyo 20-29, 2026—isang buwan bago ang State of the Nation Address (SONA) ni Pangulong Ferdinand R. Marcos Jr. Ayon sa resulta, 42% ng mga adult na Pilipino ang satisfied, 17% ang hindi tiyak, at 40% ang dissatisfied sa pangkalahatang pagganap ng administrasyon.
Ang 14-point recovery na ito ay malaking pagbangon mula sa rekorba na -13 noong Marso, na siyang pinakamababang marka ng Marcos Jr. administration at pinakamababa sa nakalipas na 16 taon.
Governance Report Card: Panalo sa Edukasyon, Lugami sa Implasyon
Sa 17 tiyak na isyung sinuri ng SWS, nakakuha ang administrasyon ng magkakaibang antas ng pagtanggap:
- Very Good (4 na isyu): Edukasyon sa pampublikong paaralan (+68), pagpapabuti ng kalidad ng edukasyon ng kabataan (+58), pagtulong sa mahihirap (+52), at paglikha ng mga trabaho (+51).
- Good (5 isyu): Agham at teknolohiya (+49), pabahay para sa mahihirap (+48), seguridad sa pagkain (+41), pagdepensa sa teritoryo sa West Philippine Sea (+35), at pampublikong transportasyon (+33).
- Moderate (3 isyu): Pagsugpo sa gutom (+26), paghahanda sa climate change (+24), at pag-aalaga sa mga OFW sa Middle East (+15).
- Neutral (3 isyu): Solusyon sa presyo ng langis (net zero), pagbabantay sa pagmamalabis ng mga kumpanya ng langis (-6), at paglaban sa kriminalidad (-8).
- Poor (2 isyu): Napanatili namang mababa at bagsak ang marka ng pamahalaan sa paglaban sa implasyon (-12) at pagsugpo sa graft at korapsyon sa gobyerno (-14).
Pagtaas sa Lahat ng Rehiyon at Sektor
Nagtala ng pagtaas sa net satisfaction rating ang pamahalaan sa lahat ng pangunahing rehiyon kumpara noong Marso:
- Balance Luzon: +13 (mula net zero)
- Visayas: +5 (mula -23)
- Metro Manila: -11 (mula -23)
- Mindanao: -17 (mula -27)
Bukod dito, tumaas din ang satisfaction ng administrasyon sa parehong rural (+10 mula -8) at urban (-7 mula -18) na mga lugar, pati na rin sa lahat ng pangkat ng edad at antas ng pinag-aralan.
Ang Second Quarter 2026 Social Weather Survey ay isinagawa sa pamamagitan ng face-to-face interviews sa 1,200 adult sa buong bansa. Ito ay sariling inisyatibo ng SWS at hindi pondo ng anumang pampolitikang grupo.
About the Author
