Pormal nang pinasinayaan ng Pag-IBIG Fund at Barangka Credit Cooperative (BCC) noong Martes ang BCC Masinag Three-Storey Residential Building sa Barangay Mayamot, Antipolo City.
Ang naturang gusali ang kauna-unahang proyektong napondohan sa ilalim ng Pag-IBIG Fund Rental Housing Construction Loan Program (Circular No. 437).
“Sa pagbubukas ng BCC Masinag three-story residential building, nagsisimula ang panibagong yugto ng inyong paglilingkod. Ipinagmamalaki ng Pag-IBIG Fund na maging katuwang ninyo sa mahalagang proyektong ito,” pahayag ni Pag-IBIG Fund Chief Executive Officer Marilene Acosta sa kanyang talumpati sa inaugurasyon.
Sa pamamagitan ng programang ito, ang mga kwalipikadong organisasyon ay makakakuha ng pondo upang makapagtayo ng ligtas, maayos, at abot-kayang paupahang bahay. Layunin nitong tugunan ang pangangailangan ng mga Pilipinong mas angkop muna ang pag-upa sa kasalukuyan, lalo na ang mga naghahanda pa lamang para sa pagbili ng sariling tahanan.
- Sukat ng mga Unit: Naglalaro sa 19.55 hanggang 40.55 square meters.
- Upa: Mas mababa kumpara sa karaniwang singil ng paupahan sa paligid ng lugar.
- Sino ang Makikinabang: Mga kasapi ng kooperatiba, pati na rin ang mga manggagawa at estudyanteng naghahanap ng tirahang malapit sa kanilang pinagtatrabahuhan o pinag-aaralan.
“Sama-sama nating tulungan ang mas maraming Pilipino na magkaroon ng tahanang ligtas, maayos at abot-kaya sa pamamagitan man ng sariling bahay o ng paupahang tirahang angkop sa kanilang pangangailangan,” dagdag pa ni Acosta.
Para sa mga organisasyong interesadong magtayo ng sarili nilang rental housing project, maaari silang bumisita sa pinakamalapit na sangay ng Pag-IBIG Fund o sumangguni sa opisyal na website ng ahensya.
About the Author
