Humina muli ang piso sa ikalawang sunod na araw at tuluyang bumagsak sa lampas ₱62 kada dolyar — pinakamahinang antas sa kasaysayan. Sa pagtatapos ng kalakalan nitong Biyernes, lumubog ang piso sa ₱62.265, mas mababa pa kaysa dating rekord na ₱61.888.
Sa pagdinig sa Senado, ipinaliwanag ni Bangko Sentral ng Pilipinas (BSP) Governor Eli Remolona Jr. na mahirap pigilan ang pagbaba ng piso dahil sa current account deficit ng bansa. Posibleng mag‑intervene ang BSP sa merkado sa pamamagitan ng pagbebenta ng dolyar, ngunit hindi ito praktikal dahil mauubusan ng reserves.
Sa programang Diskarteng Wais sa Radyo Pilipinas World Service, sinabi ni financial analyst Jonathan Ravelas na ang gross international reserves (GIR) ay nagsisilbing panangga ng piso laban sa matinding volatility. Nasa $104 bilyon na lang ito mula sa $113 bilyon sa simula ng taon. Kapag lumalaki ang import ng pagkain, petrolyo, at transport fuel, lalong lumalakas ang demand sa dolyar at lumalalim ang deficit.
Dagdag pa rito, lumalakas ang dolyar tuwing may geopolitical risk at uncertainty, gaya ng sigalot sa Gitnang Silangan. Kaya’t kahit pansamantalang nakikinabang ang mga pamilya ng OFWs sa mas mataas na palitan, mabilis ding kinakain ng inflation ang kanilang purchasing power.
Giit ni Remolona, pangmatagalang sagot ang pagpapalakas ng export sector — mula sa turismo at BPO hanggang sa mga proyektong gaya ng Pax Silica Hub at Luzon Economic Corridor. Dagdag ni Ravelas, ang pag‑angat ng high‑value exports tulad ng cacao at mangga ay makatutulong sa pagpapatatag ng reserves at sa pagbawi ng piso.
About the Author
