Pormal na inilunsad ni Mayor Edwin Olivarez nitong Biyernes ang paggamit ng mga walkthrough metal detector sa mga pampublikong paaralan sa Lungsod ng Parañaque upang matiyak ang kaligtasan ng mga mag-aaral, kasunod ng mga insidente ng pamamaril at pananaksak sa mga paaralan sa iba’t ibang bahagi ng bansa.
“Itong walkthrough metal detectors ay para i-augment ang security measures na ipinapatupad ng ating mga eskwelahan at Civilian Security Unit sa iba’t ibang paaralan dito sa Parañaque. Kailangang masiguro natin na safe lagi ang mga bata,” pahayag ni Olivarez habang pinangunahan niya ang seremonya ng paglulunsad sa Don Bosco Elementary School sa Barangay Don Bosco nitong Biyernes.
Pinangunahan din ni Olivarez ang paglulunsad ng walkthrough metal detector sa pangunahing campus ng Parañaque National High School sa Barangay San Dionisio kalaunan ng araw.
Bago nito, naglagay ang Pamahalaang Lungsod ng mga closed-circuit television (CCTV) camera sa mga bakuran ng paaralan at nagtalaga ng mga tauhan ng Civil Security Unit sa iba’t ibang campus upang ipatupad ang mga hakbang sa seguridad, katuwang ang mga guwardiya at opisyal ng mga paaralan.
Ayon kay Olivarez, nagsimula noong nakaraang linggo ang paglalagay ng mga walkthrough metal detector sa mga pampublikong paaralan sa buong lungsod.
“Ang 97,797 na bilang ng ating mga mag-aaral sa Parañque ay hindi lamang basta-basta numero. Sila po ay may mga pangarap, mga kinabukasan, at mga buhay na dapat nating pangalagaan. Kaya’t napakahalaga para po sa ating Lungsod na mapaigting ang seguridad ng ating mga eskwelahan,” diin ni Olivarez.
May kabuuang 16 na walkthrough metal detector, na kilala rin bilang full-body scanner, ang kasalukuyang nakakabit sa iba’t ibang mataas na paaralan sa lungsod.
Tatlong metal detector ang inilagay sa Parañaque National High School Main, habang tig-iisa naman sa Don Bosco High School, PNHS Senior High School, Moonwalk National High School, Sun Valley National High School, Dr. Arcadio Santos National High School, Masville National High School, Masville Senior High School, Parañaque Science High School, Tambo National High School, Marcelo Green National High School, Don Galo National High School, Sto. Niño National High School, at San Antonio National High School.
Ayon kay Dolly Villar, pinuno ng Parañaque Local School Board, ang susunod na batch ng mga scanner—dalawa para sa mga mataas na paaralan at pito para sa mga elementarya—ay ilalagay sa pagitan ng Oktubre at Nobyembre.
Sinabi ng alkalde na target nilang magkaroon ng mga scanner sa lahat ng 45 pampublikong elementarya at mataas na paaralan sa lungsod pagsapit ng susunod na taon.
Hinimok din ni Olivarez ang mga pribadong elementarya at mataas na paaralan na maglagay din ng mga walkthrough metal detector sa kanilang mga kampus.
“Ang gusto po natin ay pati mga private school po ay may ganito, kasi ang mga nangyaring insidente ay hindi lang limited sa public schools. We can’t leave gaps pagdating sa safety ng mga bata,” aniya.
📸 Parañaque LGU
