Panukalang magpapalawak sa legal assistance fund para sa mga OFW, lusot na sa ikalawang pagbasa sa Kamara

Odette Rio October 1, 2026 2 minutes read

Aprubado na sa ikalawang pagbasa sa Kamara ang House Bill 9462 o panukalang magpapalawak sa paggamit ng Legal Assistance Fund para sa mga Overseas Filipino Workers o OFWs na nangangailangan ng tulong sa ibang bansa.

Ayon sa sponsor ng panukala na si House Committee on Overseas Workers Affairs Chairperson Bryan Revilla, layunin nitong palakasin ang legal protection ng mga Pilipino at OFW na nahaharap sa problema sa ibang bansa.

Aamyendahan ng panukala ang Section 26 ng Republic Act No. 8042 o Migrant Workers and Overseas Filipinos Act at Section 14 ng Republic Act No. 11641 o Department of Migrant Workers Act.

Sa ilalim ng panukala, maaaring gamitin ang Legal Assistance Fund mula sa imbestigasyon, pagkakaaresto o pagsasampa ng kaso hanggang sa paglilitis at apela.

Palalawakin din ang paggamit ng pondo upang makatulong sa paghahain ng labor complaints laban sa abusadong employer at pagsasampa ng criminal cases.

Sa paraang ito, paiigtingin ang proteksyong legal sa mga OFW at magiging mas malinaw ang paghahati ng tungkulin ng Department of Foreign Affairs at Department of Migrant Workers sa pagbibigay ng tulong.

“This ensures that the government funds for legal aid are used in standard efficient in the careful way. Finally, the bill guarantees that no Filipinois left behind in countries where the DMW does not have an MWO or Migrant Workers office. The DFA is ordered to step in and give them full legal and practical help to our OFWs. Madam Speaker, House Bill No. 9462 does more than just give financial aid. It provides real protection. It ensures that when our countrymen work abroad, they do not leave their rights behind.” saad ni Revilla sa kaniyang sponsorship speech.