dhsud-condo-4ph - 1
Inaasahang lalagda ngayong linggo ang dalawang kilalang developer sa kasunduan sa Pag-IBIG Fund upang pormal na sumali sa Expanded Pambansang Pabahay para sa Pilipino (4PH) Program.
Ayon kay Department of Human Settlements and Urban Development (DHSUD) Secretary Jose Ramon Aliling, layon nitong palawakin ang partisipasyon ng pribadong sektor sa programa.
Sa ngayon, limang developer na ang lumagda sa memorandum of understanding (MOU): Megawide Construction Corp., Amaia at Avida ng Ayala Land Inc., SM Development Corp., Filinvest Land Inc., at Robinsons Land Corp.
Sa ilalim ng kasunduan, mag-aalok ang mga developer ng mga piling housing unit sa paborableng presyo at iba pang insentibo para sa mga kuwalipikadong miyembro ng Pag-IBIG Fund.
Inaasahang magbibigay ito ng mas maraming pagpipilian sa pabahay para sa mga Pilipinong nais magkaroon ng sariling bahay.
About the Author
