Ipinag-utos na ni Department of Transportation o DOTr Secretary Vince Dizon sa Maritime Industry Authority o MARINA ang pagsuspinde sa Passenger Ship Safety Certificate ng MV Virgen de Peñafrancia II matapos itong tumagilid malapit sa Real Port sa Quezon, madaling araw ng Biyernes, Oktubre 30.
Dahil dito, hindi muna papayagang maglayag ang naturang barko hangga’t hindi ito sumasailalim at nakapapasa sa masusing safety inspection ng MARINA.
Matatandaang nasagip ng Philippine Coast Guard o PCG ang 40 pasahero at 18 tripulante ng barko, kabilang ang dalawang sanggol. Ligtas namang nailikas ang lahat ng 58 indibidwal at walang naiulat na nasaktan.
Tiniyak naman ng DOTr na hindi nito kukunsintihin ang anumang paglabag sa maritime safety regulations na maaaring maglagay sa buhay ng mga pasahero sa panganib.
Kaya paalala ng DOTr sa iba pang maritime at passenger vessels na tiyaking nasa maayos na kondisyon ang kanilang mga sasakyang pandagat upang hindi magdulot ng anomang aberya lalo na sa kanilang mga pasahero.
About the Author
